Թափանցիկ Ջակոմոն
Վաղուց, շատ վաղուց, կամ գուցե մի-քիչ շուտ, աշխարհի ծայրին, կամ գուցե մի-քիչ ավելի մոտ, չտեսնված մի թագավորության մայրաքաղաքում ծնվեց մի թափանցիկ տղա: Այնքան թափանցիկ, որ նրա միջից կարելի էր տեսնել ամեն բան, ինչպես օդի միջից կամ ինչպես աղբյուրի պարզ ջրի միջից: Նա էլ մարմին ու արյուն ուներ, ինչպես բոլորը: Ճիշտ է, նա թափանցիկ էր, ապակու էր նման, բայց երբ ընկնում էր, չէր փշրվում, ամենաշատը՝ճակատին մի փոքրիկ, թափանցիկ ուռուցք էր գոյանում:
Բոլորը տեսնում էին, թե ինչպես էր նրա արյունը շարժվում, ինչպես էր նրա սիրտը բաբախում: Պատկերացնում եք՝ նրա մտքերն էին էին պարզ երևում. մարդիկ ազատ կարդում էին նրա մտքերը, որոնք անցնում- դառնում էին նրա գլխում, լողում և փայլփլում, ինչպես ձկների խմբերը թափանցիկ ջրավազանում:
Մի անգամ տղան սխալմամբ սուտ ասաց, և մարդիկ իսկույն տեսան կրակե գնդիկի պես մի բան, որը բոցավառվեց նրա ճակատին: Երբ տղան ուղղեց իր սխալը և ճիշտ խոսեց, գնդիկը հալվեց ու անհետացավ: Այդ օրվանից նա իր ամբողջ կյանքում ոչ մի տառ սուտ չասաց : Այդ օրվանից ամբողջ կյանքում նա ոչ մի անգամ և ոչ մի տառ սուտ չասաց:
Մի անգամ Ջակոմոյի ընկերը նրան մի գաղտնիք վստահեց: Եվ բոլորը միանգամից տեսան, թե նրա գլխում ինչպես սկսեց անհանգիստ պտտվել մի սև գունդ: Եվ գաղտնիքը էլ գաղտնիք չէր:
Մի անգամ Ջակոմոյի ընկերը նրան մի գաղտնիք վստահեց, և նույն րոպեին սև գնդի նման մի բան անհանգիստ գլորվեց և պտտվեց նրա գլխում: Իհարկե, բոլորն էլ տեսան այդ գունդը, և գաղտնիքն էլ գաղտնիք չէր:
Ժամանակ անցավ, տղան մեծացավ, դարձավ պատանի, հետո տղամարդ: Բայց առաջվա նման բոլորը կարող էին հեշտ ու հանգիստ կարդալ նրա բոլոր մտքերը: Նա կարող էր բարձրաձայն պատասխանել իրեն ուղղված հարցերին, մեկ է, ամեն ինչ երևում էր:
Երբ տղան ծնվեց, նրա անունը Ջակոմո դրեցին, բայց ժողովուրդը նրանկ Ջակոմո-Ապակի էր կոչում, և շատ էր սիրում նրան իր ազնվության համար:
Նրա կողքին բոլորը բարիվ ու ազնիվ էին դառնում:
Դժբախտաբար անսպասելի կերպով այդ պետության ղեկավար դարձավ մի դաժան բռնակալ: Ժողովրդը շատ վատ վիճակի մեջ ընկավ: Բոլորին ճնշում էին, բոլորն աղքատ էին, ոչ ոք չէր կարողանում ձայն հանել: Ով բողոքում էր , դաժան բռնակալը հրամայում էր մահապատժի ենթարկել:
Ժողովուրդը ձայն չէր հանում, լռում էր և համբերում, որովհետև վախենում էր, որ կարող է ավելի վատ լինել:
Բայց Ջակոմոն չէր կարող լռել: Եթե ոչ մի բառ էլ չասեր, մեկ է, նրա մտքերը երևում էին: Չէ՞ որ նա թափանցիկ էր, և բոլորը տեսնում էին, թե ինչպես էր նա բարկանում անարդարությունից և բռնությունից և ատում բռնակալին:
Ժողովուրդը գաղտնի կրկնում էր Ջակոմոյի մտքերը և այդպիսով կամաց-կամաց հուսադրվում:
Բռնակալն իմանում է այդ մասին և հրամայում անմիջապես բռնել Թափանցիկ Ջակոմոյին և գցել ամենամութ բանտը:
Հենց այդ ժամանակ էլ պատահեց աներևակայելի մի բան: Այն բանտախցի պատերը , որտեղ Ջակոմոն փակված էր, նույնպես հանկարծ թափանցիկ դարձան, հետո թախանցիկ դարձան միջանցքի պատերը, հետո բանտի արտաքին պատերը. ամբողջ բանտը կարծես ապակուց դարձավ:
Այն մարդիկ , ովքեր անցնում էին բանտի մոտով, կարողանում էին տեսնել Ջակոմոյին՝ նստած իր բանտախցում, և առաջվա նման կարողանում էին կարդալ նրա մտքերը:
Երբ գիշեր եղավ, բանտն այնքան պայծառ լուսավորեց քաղաքը, որ բռնակալը հրամայեց փակել իր պալատի լուսամուտները, որ լույսն իրեն չխանգարի: Բայց, միևնույն է, նա չկարողացավ հանգիստ քնել: Չնայած այն բանին, որ Թափանցիկ Ջակոմոն շղթայված էր և փակված էր ամենամութ բանտում , էլի նրանից ավելի ուժեղ դուրս եկավ:
Իսկ գիտե՞ք, թե ինչու… Որովհետև աշխարհի ամենաուժեղ բանը ճշմարտությունն է , այն ավելի պայծառ է, քան՝ ցերեկվա լույսը, և ավելի ուժեղ է ցանկացած փոթորիկից:
Հ.Թումանյան «Սասունցի Դավիթը»
1
Առյուծ Մըհերը, զարմով դյուցազուն,
Քառասուն տարի իշխում էր Սասուն.
Իշխում էր ահեղ, ու նըրա օրով
Հավքն էլ չէր անցնում Սասմա սարերով։
Սասմա սարերից շա՜տ ու շատ հեռու
Թնդում էր նրա հռչակն ահարկու,
Խոսվում էր իր փառքն, արարքն անվեհեր.
Հազար բերան էր — մի Առյուծ-Մհեր։
2
Էսպես, ահավոր առյուծի նըման,
Սասմա սարերում նստած էր իշխան
Քառասուն տարի։ Քառասուն տարում
«Ա՜խ» չէր քաշել նա դեռ իրեն օրում.
Բայց հիմի, երբ որ եկավ ծերացավ,
Էն անահ սիրտը ներս սողաց մի ցավ։
Սկըսավ մըտածել դյուցազուն ծերը.
— Հասել էն կյանքիս աշնան օրերը,
Շուտով սև հողին կերթամ ես գերի,
Կանցնի ծըխի պես փառքը Մըհերի,
Կանցնեն և՛ անուն, և՛ սարսափ, և՛ ահ,
Իմ անտեր ու որբ աշխարքի վըրա
Ոտի կըկանգնեն հազար քաջ ու դև…
Մի ժառանգ չունեմ՝ իմ անցման ետև
Իմ թուրը կապի, Սասուն պահպանի…
Ու միտք էր անում հըսկան ծերունի։
3
Մի օր էլ՝ էն գորշ հոնքերը կիտած
Երբ միտք էր անում, երկընքից հանկարծ
Մի հուր-հըրեղեն հայտնվեց քաջին,
Ոտները ամպոտ կանգնեց առաջին։
— Ողջո՜ւյն մեծազոր Սասմա հըսկային.
Քու ձենը հասավ աստծու գահին,
Ու շուտով նա քեզ մի զավակ կըտա։
Բայց լավ իմանաս, լեռների արքա,
Որ օրը որ քեզ ժառանգ է տըվել,
Էն օր կըմեռնեք քու կինն էլ, դու էլ։
— Իր կամքը լինի, ասավ Մհերը.
Մենք մահինն ենք միշտ ու մահը մերը,
Բայց որ աշխարքում ժառանգ ունենանք,
Մենք էլ նըրանով անմեռ կըմընանք։
Հըրեշտակն էստեղ ցոլացավ նորից,
Ու էս երջանիկ ավետման օրից
Երբ ինը ամիս, ինը ժամն անցավ,
Առյուծ-Մըհերը զավակ ունեցավ։
Դավիթ անվանեց իրեն կորյունին,
Կանչեց իր ախպեր Ձենով Օհանին,
Երկիրն ու որդին ավանդեց նըրան,
Ու կինն էլ, ինքն էլ էն օրը մեռան։
4
Էս դարում Մըսըր անհաղթ ու հզոր
Մըսրա-Մելիքն էր նըստած թագավոր։
Հենց որ իմացավ՝ էլ Մըհեր չըկա,
Վեր կացավ կըռվով Սասունի վըրա։
Ձենով Օհանը ահից սարսափած՝
Թըշնամու առաջն ելավ գըլխաբաց,
Աղաչանք արավ, ընկավ ոտները.
— Դու եղիր, ասավ, մեր գլխի տերը,
Ու քու շըվաքում քանի որ մենք կանք,
Քու ծառան լինենք, քու խարջը միշտ տանք,
Միայն մեր երկիր քարուքանդ չանես
Ու քաղցըր աչքով մեզ մըտիկ անես։
— Չէ՛, ասավ Մելիք, քու ամբողջ ազգով
Անց պիտի կենաս իմ թըրի տակով,
Որ էգուց-էլօր, ինչ էլ որ անեմ,
Ոչ մի սասունցի թուր չառնի իմ դեմ։
Ու գընաց Օհան՝ բոլոր-բովանդակ
Սասունը բերավ, քաշեց թըրի տակ
Մենակ Դավիթը, ինչ արին-չարին,
Մոտ չեկավ դուշման Մելիքի թըրին։
Եկան քաշեցին՝ թե զոռով տանեն,
Թափ տըվավ, մարդկանց գըցեց դես ու դեն,
Փոքրիկ ճըկույթը մի քարի առավ,
Ապառաժ քարից կըրակ դուրս թըռավ։
— Պետք է սպանեմ էս փոքրիկ ծուռին,
Ասավ թագավորն իրեն մեծերին։
— Թագավո՛ր, ասին, դու էսքան հըզոր,
Թըրիդ տակին է ողջ Սասունն էսօր.
Ի՞նչ պետք է անի քեզ մի երեխա,
Թեկուզ իր տեղով հենց կըրակ դառնա։
— Դո՛ւք գիտեք, ասավ Մըսրա թագավոր,
Բայց թե իմ գըլխին փորձանք գա մի օր,
Էս օրը վըկա,
Սըրանից կըգա։
5
Էս որ պատահեց, մեր Դավիթ հըսկան
Մի մանուկ էր դեռ յոթ-ութ տարեկան.
Մանուկ եմ ասում, բայց էնքան ուժեղ,
Որ նըրա համար թե մարդ, թե մըժեղ։
Բայց վա՜յ խեղճ որբին աշխարքի վըրա,
Թեկուզ Առյուծի կորյուն լինի նա։
Ձենով Օհանին ուներ մի չար կին։
Մին-երկու լըռեց, մի օր էլ կարգին
Իրեն մարդու հետ սկըսավ կըռվել.
— Ես մենակ հոգի, հազար ցավի տեր,
Ի՞նչ ես ուրիշի եթիմը բերել,
Նըստեցրել գըլխիս պարապ հացակեր…
Հո՜ղեմ գըլուխը… ես գերի հո չե՞մ՝
Ամենքի քեֆի ետևից թըռչեմ…
Մի կուռ կորցըրո՛ւ, կարգի՛ր մի բանի,
Գընա, իր համար աշխատանք անի…
Ու հետն սկսավ ողբալ ու կոծել,
Իր օրը սըգալ, իր բախտն անիծել,
Թե անբախտ եղավ աշխարքի միջում,
Ոչ մի տեր ունի, ոչ մարդն է խըղճում…
Գընաց Օհանը երեխի ոտի
Մի զույգ ոտնաման բերավ երկաթի,
Երկաթի մի կոռ շալակին դըրած,
Ու արավ Սասմա քաղքի գառնարած։
6
Քըշեց գառները մեր հովիվ հըսկան,
Ելավ Սասունի սարերն աննըման.
«Է՜յ ջան, սարե՛ր,
Սասման սարե՜ր…»
Որ կանչեց նրա ձենից ահավոր
Դըղորդ-դըմբդըմբոցն ընկավ սար ու ձոր,
Վայրի գազաններ բըներից փախան,
Քարեքար ընկան, դատարկուն եղան։
Դավիթը ընկավ նըրանց ետևից,
Որին մի սարից, որին մի ձորից
Աղվես, նապաստակ, գել, եղնիկ բըռնեց,
Հավաքեց, բերավ, գառներին խառնեց,
Իրիկվան քըշեց ողջ Սասմա քաղաք։
Կաղկա՜նձ ու ոռնո՜ց, աղմո՜ւկ, աղաղա՜կ…
Քաղքըցիք հանկարծ մին էլ էն տեսան՝
Գալիս էն հըրես անհամար գազան.
«Վա՜յ, հարա՜յ, փախե՜ք… »
Մեծեր, երեխեք
Սըրտաճաք եղած,
Գործները թողած,
Որը տուն ընկավ, որը ժամ, խանութ,
Ու ամուր փակեց դուռն ու լուսամուտ։
Դավիթը եկավ, կանգնեց մեյդանում.
— Վա՜հ, էս մարդիկը ի՜նչ վաղ են քընում.
Հե՜յ ուլատեր, հե՛յ գառնատեր,
Ելե՛ք, շուտով բացեք դըռներ.
Ով մինն ուներ — տասն եմ բերել,
Ով տասն ուներ — քըսանն արել…
Շուտով ելե՛ք, եկե՜ք, տարե՜ք,
Ձեր գառն ու ուլ գոմերն արեք։
Տեսավ՝ չեն գալի, դուռ չեն բաց անում,
Ինքն էլ մեկնըվեց քաղքի մեյդանում,
Գըլուխը դըրավ մի քարի՝ մընաց,
Ու մուշ-մուշ քընեց մինչև լուսաբաց։
Լուսին իշխաններ ելան միասին,
Գընացին Ձենով Օհանին ասին.
— Տո՛ Ձենով Օհան, տո՛ մահի տարած,
Էս խենթը բերիր, արիր գառնարած,
Ոչ գառն է ջոկում, ոչ գելն ու աղվես,
Գազանով լըցրեց մեր քաղաքն էսպես,
Աստված կըսիրես՝ դի՛ր ուրիշ բանի,
Թե չէ էս խա՛լխին լեղաճաք կանի։
7
Ելավ Օհանը, Դավթի մոտ գնաց.
— Հորեղբայր Օհան, հեռո՜ւ եկ, կամա՜ց,
Ուլեր կըփախչեն։ — Մին էլ էնտեղից
Մի բոզ նապաստակ, ականջները ցից,
Խրտնեց ու ահից դուրս պրծավ հանկարծ։
Դավիթն էր. ելավ, ետևից ընկած
Էն սարը քշեց, ետ բերավ էս ձոր,
Բերավ, ուլերին խառնեց նորից նոր։
— Օ՜ֆ, ի՜նչ դըժվար է, հորեղբայր Օհան.
Աստված օխնել է էն սև-սև ուլեր,
Ամա բոզալուկ էս ուլեր, որ կան,
Փախչում են, ցըրվում ողջ սարերն ի վեր.
Էնքան եմ երեկ վազել, չարչարվե՜լ,
Մինչև հավաքել ու տուն եմ բերե՜լ…
Նայեց Օհանը, որ Դավթի հագին
Ոտնաման չի էլ մընացել կարգին,
Մահակն էլ մաշվել, մինչ բուռն է հասել,
Մի օրվա միջում էնքան է վազել։
— Դավի՛թ ջան, ասավ, չեմ թողնի էսպես,
Բոզալուկ ուլեր չարչարում են քեզ.
Էգուց նախիրը կըտանես արոտ։
Ասավ Օհանը ու մյուս առավոտ
Գընաց, նորից նոր մեր Դավթի ոտի
Մի ջուխտ նոր տըրեխ բերավ երկաթի,
Երկաթի մի կոռ հարյուր լըդրական
Ու շինեց Սասմա քաղքի նախրապան։
8
Քըշեց նախիրը մեր նախրորդ հըսկան,
Ելավ Սասունի սարերն աննըման։
«Է՜յ ջան, սարե՛ր,
Սասման սարե՛ր,
Ի՜նչ անուշ է
Ձեր լանջն ի վեր…»
Որ կանչեց, նըրա ձենից ահավոր
Դըղորդ-դըմբդըմբոցն ընկավ սար ու ձոր։
Վայրի գազաններ բըներից փախան,
Քարեքար ընկան, դատարկուն եղան։
Դավիթն էր. ընկավ նրանց ետևից,
Որին մի սարից, որին մի ձորից,
Գել, ինձ, առյուծ, արջ, վագըր բռնեց,
Հավաքեց, բերավ, իր նախրին խառնեց
Ու առաջն արավ դեպի Սասմա քաղաք։
Ոռնո՜ց, մըռընչյո՜ւն, աղմո՜ւկ, աղաղա՜կ…
Վախկոտ քաղքըցիք մին էլ ի՜նչ տեսան,
Հենց քաղքի վըրա անհամար գազան…
«Վա՜յ, հարա՜յ, փախե՜ք…»
Մեծեր, երեխեք
Սըրտաճաք եղած,
Գործները թողած
Փախան, ներս ընկան տուն, ժամ կամ խանութ,
Ամուր փակեցին դուռն ու լուսամուտ։
Դավիթը եկավ կանգնեց մեյդանում.
— Վա՜հ, էս քաղքըցիք ի՜նչ վաղ են քընում։
Հե՜յ կովատեր, հե՜յ գոմշատեր,
Ելե՛ք, շուտով բացեք դըռներ,
Ով մինն ուներ — տասն եմ բերել,
Ով տասն ուներ — քըսանն արել։
Շուտով ելե՜ք, եկե՜ք, տարե՜ք,
Ձեր եզն ու կով գոմերն արեք։
Տեսավ՝ չեն գալի, դուռ չեն բաց անում,
Ինքն էլ մեկնըվեց քաղքի մեյդանում,
Գըլուխը դըրավ մի քարի, մընաց,
Ու մուշ-մուշ քընեց մինչև լուսաբաց։
Լուսին իշխաններ ելան միասին,
Գընացին Ձենով Օհանին ասին.
— Ամա՜ն, քեզ մատաղ, ա՛յ Օհան ախպեր,
Մեր եզն ու մեր կով թող մընան անտեր,
Միայն սրանից ազատ արա մեզ։
Ոչ արջն է ջոկում, ոչ գոմեշն ու եզ,
Մի օր էլ քաղքին փորձանք կըբերի,
Արջերոց կանի, կըտա կավերի։
9
Դավիթ չըդառավ, մի կըրա՜կ դառավ։
Ճարը կըտըրված՝ Օհանը բերավ
Նետ-աղեղ շինեց ու տըվավ իրեն՝
Գընա, որս անի սարերի վըրեն։
Դավիթ նետ-աղեղն առավ Օհանից,
Հեռացավ Սասմա քաղաքի սահմանից
Ու դառավ որսկան։ նաց, մի կորկում
Լոր էր սպանում, ճնճղուկ էր զարկում,
Մըթանը գընում իրեն հոր ծանոթ
Աղքատ, անորդի մի ծեր կընկա մոտ,
Վիշապի նըման, երկա՜ր, ահագի՜ն
Մեկնըվում, քընում կըրակի կողքին։
Մի օր էլ, երբ որ իր որսից դարձավ,
Պառավը վըրեն սաստիկ բարկացավ։
— Վա՜յ Դավիթ, ասավ, մահըս տանի քեզ,
Դո՞ւ պետք է էն հոր զավակը լինե՜ս։
Ձեռից ու ոտից ընկած մի ծեր կին —
Ես եմ ու էն արտն աստըծու տակին,
Ինչո՞ւ ես գընում, տափում, տըրորում,
Իմ ամբողջ տարվան ապրուստը կըտրում։
Թե որսկան ես դու — նետ-աղեղըդ ա՛ռ,
Ծըծմակա գըլխից մինչև Սեղանսար
Քու հերը ձեռին մի աշխարհ ուներ,
Որսով մեջը լի որսի սար ուներ.
Եղնիկ կա էնտեղ, այծյամ ու պախրա.
Կարո՞ղ ես — գընա, էնտեղ որս արա։
— Ի՞նչ ես, ա՛յ պառավ, էլ ինձ անիծում.
Ես ջահիլ եմ դեռ, ես նոր եմ լըսում։
Ո՞րտեղ է հապա սարը մեր որսի…
— Գընա՛, հորեղբայրդ — Օհանը կասի։
10
Հորեղբոր շեմքում մյուս օրը ծեգին
Դավիթը կանգնեց աղեղը ձեռքին։
— Հորեղբա՛յր Օհան, ինչո՞ւ չես ասել՝
Իմ հերը որսի սար է ունեցել,
Այծյամ կա էնտեղ, եղջերու, կըխտար.
Վեր կաց, հորեղբա՛յր, տար ինձ որսասար։
— Վա՜յ, կանչեց Օհան, էդ քու խոսքը չէր,
Էդ ով քեզ ասավ, լեզուն պապանձվեր։
Էն սարը, որդի՛, գնաց մեր ձեռից,
Էն սարի որսն էլ գնաց էն սարից,
Էլ չկան այծյամ, եղջերու, կըխտար։
Քանի լուսեղեն քու հերը դեռ կար,
(Է՜յ գիդի օրեր — ո՜րտեղ եք կորել),
Ես շատ եմ էնտեղ որսի միս կերել…
Քու հերը մեռավ, աստված խըռովեց,
Մըսրա թագավոր զորքեր ժողովեց,
Եկավ, մեր երկիր քարուքանդ արավ,
Էս սարի որսն էլ թալանեց, տարավ.
Եղնիկը գընաց, եղջերուն գընաց…
Մեր գիրն էլ հալբաթ էսպես էր գրած։
Անցել է, որդի, քու բանին գընա,
Մըսրա թագավոր ձենըդ կիմանա…
— Մըսրա թագավոր ինձ ի՞նչ կանի որ…
Ես ի՞նչ եմ հարցնում Մըսրա թագավոր.
Մըսրա թագավոր թող Մըսըր կենա,
Իմ հոր սարերում ի՞նչ գործ ունի նա…
Վեր կաց, հորեղբա՛յր, նետ-աղեղդ առ,
Կապարճըդ կապի՛ր, գընանք որսասար։
Ելավ Օհանը ճարը կըտըրված,
Գընացին տեսան՝ էլ ի՜նչ որսասար.
Անտառը ջարդած, պարիսպն ավերած,
Բուրգերը արած գետնին հավասար…
11
Գիշերը հասավ, մընացին էնտեղ։
Ձենով Օհանն էր, իր նետն ու աղեղ
Դըրավ գլխի տակ, հանգիստ խըռըմփաց.
Դավիթը մնաց մտքի ծովն ընկած։
Մին էլ նկատեց, որ մութը հեռվում
Մի թեժ, փայլփլուն կըրակ է վառվում։
Էն լուսը բըռնած՝
Վեր կացավ, գնաց,
Գընաց ու գընա՜ց, բարձրացավ մի սար,
Բարձրացավ, տեսավ մի մեծ մարմար քար
Կիսից պատըռված,
Ու միջից վառված
Բըխում է լուսը պա՜րզ, քուլա-քուլա՜,
Բարձրանում, իջնում ետ քարի վըրա։
Վար իջավ Դավիթ էնտեղից կըրկին,
Վար իջավ, կանչեց Ձենով Օհանին.
— Ե՛լ, էն պայծառ լուսը մի տես։
Լուս է իջել բարձըր սարին,
Բարձըր սարին, մարմար քարին։
Ե՛լ, հորեղբայր, անուշ քընից.
Էն ի՞նչ լուս է բըխում քարից։
Ելավ, խաչ քաշեց Օհանն երեսին.
— Է՜յ, որդի՛, ասավ, մեռնեմ իր լուսին,
Էն մեր Մարութա սարն է զորավոր։
Էն լուսի տեղը կանգնած էր մի օր
Սասմա ապավեն, Սասմա պահապան
Մեր սուրբ Տիրամոր վանքը Չարխափան։
Մըշտական, երբ որ կըռիվ էր գընում,
Էնտեղ էր քու հերն իր աղոթքն անում։
Քու հերը մեռավ, աստված խըռովեց,
Մըսրա թագավոր զորքեր ժողովեց,
Մեր վանքն էլ եկավ քանդեց էն սարում,
Բայց դեռ սեղանից լուս է բարձրանում…
12
Դավիթը էս էլ երբ որ իմացավ,
— Անո՛ւշ հորեղբայր, հորեղբա՛յր ասավ,
Որբ եմ ու անտեր աշխարքի վըրա,
Հեր չունեմ՝ դու ինձ հերություն արա՛։
Էլ չեմ իջնի ես Մարութա սարից,
Մինչև չըշինեմ մեր վանքը նորից։
Քեզանից կուզեմ հինգ հարյուր վարպետ,
Հինգ հազար բանվոր մըշակ նըրանց հետ,
Որ գան՝ էս շաբաթ կանգնեն ու բանեն,
Առաջվան կարգով մեր վանքը շինեն։
Գընաց Օհանը ու բերավ իր հետ
Հինգ հազար բանվոր, հինգ հարյուր վարպետ։
Վարպետ ու բանվոր եկան կանգնեցին,
Չըրը՛խկ հա թըրը՛խկ նորից շինեցին,
Առաջվան կարգով, փառքով փառավոր
Բարձըր Մարութա վանքը Տիրամոր։
Ցըրված միաբանք ետ նորից եկան,
Նորից թընդացին աղոթք, շարական.
Ու երբ շեն արավ հոր վանքը նորից,
Ձած իջավ Դավիթ Մարութա սարից։
13
Համբավը տարան Մըսրա Մելիքին.
— Հապա՜ չես ասիլ՝ Դավիթը կրկին
Հոր վանքը շինել, իշխան է դառել,
Դու օխտը տարվան խարջը չես առել։
Մելիք զայրացավ.
— Գընացե՛ք, ասավ,
Բադին, Կոզբադին,
Սյուդին, Չարխադին,
Սասմա քար ու հող տակն ու վեր արեք,
Իմ օխտը տարվան խարաջը բերեք։
Քառսուն կույս աղջիկ բերեք արմաղան,
Քառսուն կարճ կընիկ, որ եկանք աղան,
Քառասունն էլ երկար, որ ուղտեր բառնան,
Իմ տանն ու դըռան ղարավաշ դառնան։
Ու Կոզբադին առավ զորքեր.
— Գըլխի՛ս վըրա, ասավ, իմ տեր.
Գընամ հիմի քանդեմ Սասուն,
Կանայք բերեմ քառսուն-քառսուն,
Քառսուն բեռնով դեղին ոսկի,
Տեղը ջընջեմ հայոց ազգի։
Ասավ, Մըսրա աղջիկ ու կին
Պար բըռնեցին ու երգեցին.
Մեր Կոզբադին գընաց Սասուն,
Կանայք բերի քառսուն-քառսուն,
Քառսուն բեռնով ոսկի բերի,
Մեր ճակատին շարան շարի,
Կարմիր կովեր բերի կըթան՝
Գարնան շինենք եղ ու չորթան։
Ջա՛ն Կոզբադին, քաջ Կոզբադին,
Սասմա Դավթին զարկեց գետին։
Ու Կոզբադին փըքված, ուռած,
— Շնորհակալ եմ, քո՛ւյրեր, գոռաց,
Մինչև գալըս դեռ համբերեք,
Էն ժամանակ պիտի պարեք…
14
Էսպես երգով,
Զոռով-զորքով
Գոռ Կոզբադին մըտավ Սասուն.
Օհան լըսեց՝ կապվեց լեզուն։
Աղ ու հացով,
Լաց ու թացով
Առաջն ելավ,
Խընդիրք արավ.
— Ինչ որ կուզես՝ առ, տա՛ր, ամա՛ն.
Վարդ աղջիկներ, կանայք Սասման,
Դառը դադած դեղին ոսկին,
Միայն թե գըթա մեր խեղճ ազգին,
Մի՛ կոտորիր, մի՛ տար մահու,
Վերև՝ աստված, ներքևը՝ դու…
Ասավ, բերավ շարան-շարան
Վարդ աղջիկներ, կանայք Սասման։
Ու Կոզբադին կանգնեց, ջոկեց,
Մարագն արավ, դուռը փակեց,
Քառսուն կույս աղջիկ, սիրուն, արմաղան,
Քառսուն կարճ կընիկ, որ երկանք աղան,
Քառսուն էլ երկար, որ ուղտեր բառնան,
Մըսրա Մելիքին ղարավաշ դառնան։
Դեզ-դեզ կիտեց դեղին ոսկին.
Սև սուգ կալավ հայոց ազգին։
15
Հե՜յ, ո՞ւր ես, Դավի՜թ, հայոց պահապան,
Քարը պատըռվի-դո՛ւրս արի մեյդան։
Քանդած հոր վանքը որ շինեց նորից,
Ցած իջավ Դավիթ Մարութա սարից,
Ժանգոտած, անկոթ մի շեղբիկ գըտավ,
Գընաց՝ պառավի շաղգամը մըտավ։
Պառավն էր. եկավ՝ անե՜ծք, աղաղա՜կ.
— Վա՜յ, խելա՛ռ Դավիթ, շաղգամի տեղակ
Դու կըրակ ուտես, ցավ ուտես, ասավ,
Քու աչքն աշխարքում մենակ ի՞նձ տեսավ.
Կորեկըս արիր գետնին հավասար,
Էս էր մընացել ձըմեռվան պաշար,
Էս էլ կըտրում ես,
Էլ ո՞նց ապրեմ ես։
Թե կըտրիճ ես դու, աղեղդ ա՛ռ գընա՛,
Քու հոր աշխարքին տիրություն արա՛,
Քու հոր գանձը կե՛ր,
Թողել ես անտեր,
Մըսրա թագավոր մեր ի՞նչն է տանում։
— Մըսրա թագավոր քու աչքն է հանում,
Դանդալոշ Դավիթ. ղըրկել է հըրեն,
Եկել են Սասմա քաղաքի վըրեն
Բադին, Կոզբադին,
Սյուդին, Չարխադին,
Թալան են տալիս բովանդակ Սասուն.
Քառսուն բեռ ոսկի խարաջ են ուզում,
Քառսուն կույս աղջիկ սիրուն, արմաղան,
Քառսուն կարճ կընիկ, որ երկանք աղան,
Քառսուն էլ երկար, որ ուղտեր բառնան,
Մըսրա Մելիքին ղարավաշ դառնան։
— Ի՞նչ ես, ա՛յ պառավ, էլ ինձ անիծում.
Ցույց տուր մի տեսնեմ — որտե՞ղ են ուզում։
— Որտեղ են ուզում… Մահըս տանի քե՜զ.
Դո՛ւ պետք է էն հոր զավակը լինե՜ս…
Եկել ես՝ էստեղ շաղգամ ես լափում…
Ոսկին Կոզբադին ձեր տանն է չափում,
Աղջիկներ փըլեկ մարագն են լըցրած։
Շաղգամը թողեց Դավիթ ու գնաց։
Տեսավ՝ Կոզբադին իրենց տան միջին,
Թափում է ոսկին թեղած առաջին,
Սյուդին, Չարխադին պարկերն են բըռնել,
Ձենով Օհանն էլ շըլինքը ծըռել,
Կանգնել է հեռու, ձեռները ծոցին։
Տեսավ, աչքերը արնով լըցվեցին։
— Վե՛ր կաց, Կոզբադին, հեռո՛ւ կանգնիր դու,
Իմ հոր ոսկին է — ես եմ չափելու։
— Կոզբադին ասավ. — Է՜յ, Ձենով Օհան,
Կըտաս — տո՛ւր խարջը էս օխտը տարվան,
Թե չէ՝ կըգնամ, միրուքըս վըկա,
Մըսրա-Մելիքին կը պատմեմ, կըգա,
Ձեր Սասմա երկիր քար ու քանդ կանի,
Տեղը կըվարի, բոստան կըցանի։
— Կորե՛ք, անզգամ դուք Մըսրա շներ,
Բա չե՞ք իմացել դուք Սասմա ծըռեր…
Մեռա՞ծ եք կարծում դուք մեզ, թե՞ շըվաք,
Կուզեք մեր երկիր դընեք խարջի տա՜կ…
Բարկացավ Դավիթ, չափը շըպըրտեց,
Տըվավ Կոզբադնի գըլուխը ջարդեց,
Չափի փըշրանքը պատն անցավ, գընաց,
Մինչև օրս էլ դեռ գընում է թըռած։
Ու ելան՝ թափած ոսկին թողեցին,
Հայոց աշխարքից փախան գընացին
Բադին, Կոզբադին,
Սյուդին, Չարխադին։
16
Վա՜յ, վա՜յ, հորեղբա՛յր, ի՜նչ ասեմ ես քեզ.
Մենք ունենք էստեղ դեղին ոսկու դեզ,
Դու արել ես ինձ քաղաքի ծառան,
Դու թողել ես ինձ օտարի դըռան…
Հորեղբայրն ասավ. — Ա՛յ խենթ, խելագար,
Ոսկին պահել եմ Մելիքի համար,
Որ քաղցըր լինի աչքը մեզ վըրա։
Չըտըվիր, հիմի որ զորք առնի՝ գա,
Սասմա քար ու հող հեղեղի, տանի,
Ո՞վ դեմը կերթա, ո՞վ կըռիվ կանի։
— Դու կա՛ց, հորեղբա՛յր, թող գա, ե՛ս կերթամ,
Կերթամ, ե՛ս նըրան պատասխան կըտամ։
Ու մութ մարագի դըռանը զարկեց,
Փակած աղջիկներ հանեց, արձակեց։
— Գընացե՛ք, ասավ, ազատ ապրեցե՛ք,
Սասունցի Դավթին արև խընդրեցեք։
17
Էսպես ջարդված, արյունլըվա
Փախան, ընկան հողը Մըսրա
Բադին, Կոզբադին,
Սյուդին, Չարխադին։
Մըսրա կանայք հեռվից տեսան,
Հեռվից տեսան, ուրախացան
Ու ծափ տըվին կըտերներին.
— Եկա՜ն, եկա՜ն, բերի՜ն, բերի՜ն…
Մեր Կոզբադին գնաց Սասուն,
Կանայք բերավ քառսուն-քառսուն,
Կարմիր կովեր բերավ կըթան՝
Գարնան շինենք եղ ու չորթան…
Հենց մոտեցան, նըկատեցին,
Ծափ ու խնդում ընդհատեցին,
Քըրքըջացին
Ու կանչեցին.
— Է՜յ, Կոզբադին մեծաբերան,
Էդ որտեղի՞ց լերան-լերան,
Լերան-լերան կըգաս փախած,
Հաստ գըլուխըդ կիսից ճըղած։
Էն դո՞ւ չասիր՝ գընամ Սասուն,
Կանայք բերեմ քառսուն-քառսուն,
Քառսուն բեռնով ոսկի հանեմ,
Հայոց երկիր ավեր անեմ։
Գացիր Սասուն քանց գել գազան,
Ետ ես գալի քանց շուն վազան…
Ու Կոզբադին խիստ բարկացավ.
— Սո՛ւս կացեք դուք, լըրբե՛ր, ասավ.
Ձեր մարդիկն եք տեսել դուք դեռ,
Դուք չեք տեսել Սասմա ծըռեր։
Սասմա ծըռեր լերան-լերան,
Նետեր ունեն մի-մի գերան.
Սասմա երկիր քար ու կապան,
Դըժար սարեր, ձոր ու ծապան.
Նըրանց խոտեր — ինչպես կեռ թուր,
Զորք ջարդեցին երեք հարյուր…
Ասավ ու էլ չառավ դադար,
Վըռազ-վըռազ, գըլխապատառ
Վազեց իրեն թագավորին։
Խընդաց թագվորն իր աթոռին։
— Ապրե՛ս, ապրե՛ս, քաջ Կոզբադին,
Արժե՝ կախեմ ես քու ճըտին
Մեր ղուզղունի մեծ նըշանը —
Պարգև քու մեծ հաղթությանը։
Ո՞ւր են, հապա առաջըս բեր
Սասմա ոսկին ու աղջիկներ։
Ասավ Մելիք, ու Կոզբադին
Գըլուխ տըվավ մինչև գետին.
— Ապրա՜ծ կենաս, մեծ թագավոր,
Զոռով փախա ես ձիավոր,
Ո՞նց բերեի Սասմա ոսկին։
Մի խենթ ծընվեց հայոց ազգին,
Ոչ ահ գիտի, ոչ տեր ու մեծ,
Գըլուխըս էսպես տըվավ ջարդեց.
«Չե՛մ տալ, ասավ, իմ հոր ոսկին,
Չեմ տալ կանայք իմ հայ ազգին,
Սասմա երկիր ձեզ տեղ չըկա…
Քո թագավոր, ասավ թո՛ղ գա,
Թող գա՝ ինձ հետ կըռիվ անի,
Թե ղոչաղ է՝ զոռով տանի»։
Կատաղեց, փըրփըրեց Մըսրա թագավոր.
— Կանչեցե՜ք, ասավ, իմ զորքը բոլոր.
Հազար հազար մարդ նորելուկ մանուկ,
Հազար հազար մարդ անբեղ, անմորուք,
Հազար հազար մարդ բեղը նոր ծըլած,
Հազար հազար մարդ նոր թախտից ելած,
Հազար հազար մարդ թուխ միրուքավոր,
Հազար հազար մարդ սիպտակ ալևոր,
Հազար հազար մարդ որ փողեր հընչեն,
Հազար հազար մարդ, որ թըմբուկ զարկեն…
Կանչեցե՜ք, թող գան, հագնեն զե՜նք, զըրա՜հ,
Կըռիվ տի գընամ ես Դավթի վըրա,
Սասունն ավիրեմ,
Հեղեղեմ, բերեմ։
18
Էսպես անհամար զորքեր հավաքեց,
Եկավ Սասմա դաշտ, բանակը զարկեց
Ու ծանըր նըստեց Մըսրա թագավոր։
Էնքան ահագին բազմությունն էն օր
Բաթմանա ջըրին եկավ ու չոքեց,
Ով եկավ, խըմեց — գետը ցամաքեց,
Սասմա քաղաքում մընացին ծարավ։
Ձենով Օհանին զարմանքը տարավ։
Քուրքը ուսն առավ, սարը բարձրացավ.
Սարը բարձրացավ, տեսավ, ի՜նչ տեսավ։
Ճերմակ վըրանից դաշտը ճերմակել,
Ասես՝ էն գիշեր ձըմեռը եկել,
Սպիտակ ձյունով պատել էր Սասուն։
Լեղին ջուր կտրեց, կապ ընկավ լեզուն,
Հարա՜յ կանչելով՝ փախավ տուն ընկավ.
— Վա՜յ, փախե՜ք, եկա՜վ… հա՜յ, հարա՜յ, եկավ…
— Ինչը՞ հորեղբա՛յր, ի՞նչը, ի՞նչն եկավ…
— Ցավն ու կըրա՜կը Դավթի պինչն եկավ։
Մըսրա թագավոր ելել է, եկել,
Եկել, մեր դաշտին բանակ է զարկել.
Թիվ կա աստղերին, թիվ չկա զորքին…
Վա՜յ մեր արևին, վա՜յ մեր աշխարքին…
Ե՛կ, ոսկին տանենք, աղջիկներ տանենք,
Չոքենք առաջին, պաղատանք անենք,
Գուցե թե գըթա,
Մեզ սըրի չտա…
— Դու կա՛ց, հորեղբայր, դու դարդ մի՛ անիր..
նա՛, քու օդում դու հանգիստ քընիր.
Հիմի ես կելնեմ Սասմա դաշտ կերթամ,
Մըսրա-Մելիքին պատասխան կըտամ։
Ու գընաց Դավիթ ծանոթ պառավին.
— Նանի ջա՛ն, ասավ, ժանգոտած ու հին
Երկաթի կըտոր, անթարոց, շամփուր,
Ինչ ունես, չունես, հավաքի՛ր, ինձ տուր,
Մի էշ էլ գըտիր, որ վըրեն նըստեմ,
Կըռիվ տի գընամ Մըսրա զորքի դեմ։
— Վա՜յ, Դավի՛թ, ասավ, մահըս տանի քեզ.
Դո՞ւ պետք է էն հոր զավակը լինե՜ս…
Քու հերըն ուներ կըռվի համար
Հըրեղեն ձի, ոսկի քամար,
Ծալ-ծալ կապեն, գուռզը պողպատ,
Թամբ սադափեն, կուռ սաղավարտ,
Խաչ պատրաստին իր աջ բազկին,
Զըրահ շապիկ, Թուր-Կեծակին,
Դու եկել ես ա՛յ խենթ ու ծուռ,
Ինձնից կուզես էշ ու շամփո՜ւր…
— Ամա՛ն, նանի՛, չեմ լըսել դեռ։
Ո՜ւր են հիմի իմ հոր զենքեր։
— Հորեղբորըդ գընա հարցուր.
Ո՞ւր են, ասա, հանի՛ր, բեր, տուր։
Բան է, թե որ չըտա սիրով,
Աչքը հանիր՝ խըլիր զոռով։
19
Դավիթ գընաց հորեղբոր մոտ.
— Է՜յ հորեղբայր, կանչեց հերսոտ,
Իմ հերն ուներ կռվի համար
Հրեղեն ձի, ոսկի քամար,
Ծալ-ծալ կապեն գուռզը պողպատ,
Թամբ սադափեն, կուռ սաղավարտ,
Խաչ պատրաստին իր աջ բազկին,
Զըրահ շապիկ, Թուր-Կեծակին,
Կըտաս — բեր տուր…
— Վա՜յ Դավիթ ջա՜ն,
Ահից գոռաց Ձենով Օհան.
Քո հոր մահվան տարուց-օրից
Դուրս չեմ հանել ձին ախոռից,
Ոչ սընդուկից Թուր-Կեծակին,
Զըրահ շապիկ, ոսկի գոտին…
Ինձ թող ամա՜ն, մի՛ սպանիր,
Կուզես — հըրեն, գընա հանի՛ր։
20
Հագավ Դավիթ զենքն ու զըրահ,
Կապեց գոտին, Թուր-Կեծակին,
Խաչն էլ իր հաղթ բազկի վըրա,
Ելավ, հեծավ Առյուծ հոր ձին,
Հոր ձին հեծավ ու մըտրակեց.
Ձենով Օհան լալով երգեց.
— Ափսո՜ս, հազա՜ր ափսոս հըրեղեն մեր ձին,
Ա՜խ, հըրեղեն մեր ձին.
Ափսո՜ս, հազա՜ր ափսոս մեր ոսկի գոտին.
Ա՜խ, մեր ոսկի գոտին.
Ափսո՜ս թանկ կապեն, որ հագին տարավ,
Ա՜խ, որ հագին տարավ…
Դավիթ բարկացավ,
Ձին քշեց, դարձավ,
Օհանը վախեց,
Իր երգը փոխեց.
«Ափսո՜ս, նորելուկ Դավիթըս կորավ,
Ա՜խ, Դավիթըս կորավ»։
Էս որ իմացավ,
Դավիթ մեղմացավ,
Իջավ, Օհանի ձեռքը համբուրեց։
Ձենով Օհանն էլ, ինչպես հայր ու մեծ,
Օրհնեց, խըրատեց նըրան հայրաբար,
Դեպի Սասմա դաշտ դըրավ ճանապարհ։
21
Սասունցի Դավթին ուներ մի քեռի,
Անունը Թորոս, ահեղ աժդահա։
Սա էլ իմացավ համբավը կըռվի,
Մի բարդի ուսին գալիս է ահա։
Գալիս է՝ հեռվից բարձըր գոռալով.
— Ի՜նչ եք վեր եկել էս դաշտի միջում,
Քանի գըլխանի մարդիկ եք կամ ո՞վ,
Սասունցի Դավթին որ չեք ճանաչում…
Բա չե՞ք իմանում, որ էստեղ է նա
Գալու՝ խաղացնի իր ձին թևավոր.
Չըքվեցե՜ք, հիմի ուր որ է կըգա,
Եկել եմ սըրբեմ մեյդանը էսօր։
Ասավ ու քաշեց իր ուսի բարդին,
Սըրբեց բանակից մի քըսան վըրան…
Դավիթն էլ ահա սարի գագաթին
Կանգնած՝ գոռում է վիշապի նըման.
— Ով քընած եք՝ արթուն կացե՜ք,
Ով արթուն եք՝ ելե՜ք, կեցե՜ք,
Ով կեցել եք՝ զենք կապեցե՜ք,
Զենք եք կապել՝ ձի թամբեցե՜ք,
Ձի եք թամբել՝ ելե՜ք, հեծե՜ք,
Հետո չասեք՝ թե մենք քընած —
Դավիթ գող-գող եկավ, գընաց…
Էսպես կանչեց ասպանդակեց,
Ու, ինչ ամպից կեծակ զարկի,
Մըսրա զորքի մեջտեղ զարկեց,
Շողացնելով Թուր-Կեծակին։
Ջարդեց, փըշրեց մինչև կեսօր.
Կեսօր արինն ելավ հեղեղ,
Քըշեց, տարավ հազարավոր
Մարդ ու դիակ ողջ միատեղ։
Կար զորքի մեջ մի ալևոր,
Աշխարք տեսած ու բանագետ.
— Տըղե՛րք, ասավ, ճամփա տըվեք,
Գընամ խոսեմ ես Դավթի հետ։
Գընաց՝ կանգնեց Դավթի առաջ,
Էսպես խոսեց էն ծերունին.
— Դալար կենա՛, կուռըդ, ո՛վ քաջ,
Սուրըդ կըտրուկ միշտ քո ձեռին։
Մի ծերունուս խոսքին մըտիկ,
Տե՛ս, քու խելքը ինչ է կըտրում։
Ի՞նչ են արել քեզ էս մարդիկ,
Հե՞ր ես սըրանց դու կոտորում։
Ամեն մինը մի մոր որդի,
Ամեն մինը մի տան ճըրագ,
Որը կինն է թողել էնտեղ
Աչքը ճամփին, խեղճ ու կըրակ։
Որը մի տուն լիք մանուկներ,
Որը ծնող աղքատ ու ծեր,
Որը լացով քողն երեսին
Նորապըսակ ջահել հարսին…
Թագավորը զոռով-թըրով
Հավաքել է, էստեղ բերել։
Խեղճ մարդիկ ենք՝ պակաս օրով,
Մենք քեզ վընաս ի՞նչ ենք արել։
Թագավորն է քու թըշնամին,
Կըռիվ ունես — իր հետ արա,
Հե՞ր ես քաշում Թուր-Կեծակին
Էս անճարակ խալխի վըրա։
— Լավ ես ասում դու, ծերունի՛,
Ասավ Դավիթն ալևորին,
Բայց թագավորն ո՞ւր է հիմի,
Որ սև կապեմ նըրա օրին։
— Մեծ վըրանում քընած է նա,
Է՛ն, որ միջից ծուխը կելնի.
Էն ծուխն էլ հո ծուխ չի որ կա,
Գոլորշին է իր բերանի։
Ասին. դեպի մեծ վըրանը
Ասպանդակեց Դավիթն իր ձին,
Քըշեց, գընաց ու դըռանը
Գոռաց կանգնած արաբներին.
— Ո՞ւր է, ասավ, ի՞նչ է կորել,
Դուրս կանչեցե՛ք, գա ասպարեզ,
Թե մահ չունի՝ մահ եմ բերել,
Գըրող չունի՝ գըրողն եմ ես…
— Մելիքն, ասին, քուն է մըտել,
Օխտը օրով պետք է քընի.
Երեք օրն է դեռ անցկացել,
Չորս օր էլ կա, քունը առնի։
— Ի՜նչ, բերել է աղքատ ու խեղճ
Խալխին լըցրել ծովն արյունի,
Ինքը մըտել վըրանի մեջ՝
Օխտը օրով հանգիստ քընի՜…
Քընել-մընել չեմ հասկանում,
Վե՛ր կացրեք շո՜ւտ, դուրս գա մեյդան,
Էնպես դըրան ես քընացնեմ,
Որ չըզարթնի էլ հավիտյան։
Ելան՝ մարդիկ ճարահատված
Շամփուր դըրին թեժ կըրակին
Ու զարկեցին խոր մըրափած
Մըսրա-Մելքի բաց կրընկին։
— Օ՜ֆ, էլ հանգիստ քուն չունի մարդ
Էս անիծված լըվի ձեռից,
Խոր մըռընչաց հըսկան հանդարտ
Ու շուռ եկավ, քընեց նորից։
Ելան, բերին մեծ գութանի
Խոփը՝ դըրին թեժ կըրակին,
Ու կաս-կարմիր, կեծկըծալի,
Շիկնած տըվին մերկ թիկունքին։
— Օ՜ֆ, էլ հանգիստ քուն չունի մարդ
Էս անիրավ մոծակներից,
Աչքը բացավ հըսկան հանդարտ,
Ուզում էր ետ քընել նորից։
Տեսավ Դավթին։ լուխն ահեղ
Վեր բարձրացրեց մըռընչալով,
Փըչեց վըրեն, որ թըռցընի
Էն աժդըհին մի փըչելով։
Տեսավ, տեղից ժաժ չի գալի,
Զարմանքն ու ահ պատեց հոգին։
Արնոտ աչքերն ըսպառնալի
Հառեց խոժոռ Դավթի աչքին։
Նայեց թե չէ, զգաց՝ իր մեջ
Տասը գոմշի ուժ պակասեց։
Պառկած տեղից վրա նստեց
Ու ժպտալով հետը խոսեց.
— Բարո՛վ, Դավի՛թ, հոգնած ես դեռ,
Ե՛կ, մի նստի՛ր, խոսենք կարգին,
Հետո դարձյալ կըռիվ կանենք,
Եթե կըռիվ կուզես կըրկին…
Իր վըրանում բըռնակալը
Քառսուն գազ խոր հոր էր փորել,
Ցանցով փակել մութ բերանը,
Վըրեն փափուկ խալի փըռել։
Ում որ հաղթել չէր կարենում,
Շողոմելով կանչում էր նա,
Նըստեցնում էր իր վըրանում
Էն կորստյան հորի վըրա։
Իջավ Դավիթ ձիուցը ցած,
Գընաց նըստեց… ընկավ հորը.
— Հա՛, հա՛, հա՛ հա՛, քահ-քահ խընդաց
Մըսրա դաժան թագավորը։
— Դե, թող հիմի գընա՝ խավար
Հորում փըթի, էնքան մընա։
Ու ահագին մի ջաղացքար
Բերավ, դըրավ հորի վըրա։
22
Քընեց էն գիշեր Ձենով Օհանը։
Գիշերն երազում երևաց ծերին՝
Մըսրա երկընքում արև ճառագած,
Սև ամպ էր պատել Սասմա սարերին։
Սաստիկ վախեցած վեր թըռավ տեղից։
— Վա՛յ, կընի՛կ, ասավ, մի ճըրագ արա՛,
Գընա՜ց մեր անփորձ Դավիթը ձեռից,
Սև ամպ էր իջել Սասունի վըրա։
— Հողե՜մ գըլուխդ, ասավ կընիկը,
Ո՜վ գիտի՝ Դավիթն ո՛ւր է քեֆ անում…
Դու էլ քեզ համար քու տանը ընկած՝
Ուրիշի համար երազ ես տեսնում։
Քընեց Օհանը։ Վերկացավ դարձյալ.
— Կընի՛կ, Դավիթը նեղ տեղն է ընկած.
Մըսրա վառ աստղը շողում էր պայծառ.
Մեր աստղը հիվանդ ցոլքում դալկացած։
— Ի՞նչ եղավ քեզ, մա՛րդ, գիշերվան կիսին.
Բարկացավ վըրեն կընիկըն աղմուկով։
Խաչ քաշեց էլ ետ Օհանն երեսին,
Շուռ եկավ, քընեց խըռոված հոգով։
Մի ուրիշ պատկեր ավելի ահեղ.
Տեսավ՝ երկընքի բարձըր կամարում
Վառվում էր մըսրա աստղը փառահեղ,
Սասմա աստղիկը սուզվեց խավարում։
Զարթնեց վախեցած։ — Տունդ քանդվի, կի՜ն։
Ես ո՜նց լըսեցի քու էդ կարճ խելքին.
Կորավ մեն-մենակ մեր ջահելն անտեր.
Վե՛ր կաց, շո՛ւտ արա, զենքերըս մի բե՛ր…
23
Ելավ Օհան, գոմը մըտավ,
Զարկեց ճերմակ ձիու մեջքին.
— Է՜յ, ճերմակ ձի, մինչ ե՞րբ, ասավ,
Կըհասցընես Դավթի կըռվին։
«Մինչև լուսը կըհասցնեմ».
Ու ձին տըվավ փորը գետին.
— Մեջքըդ կոտրի՛, լուսն ի՞նչ անեմ.
Լաշին հասնեմ ես, թե՞ նաշին։
Կարմիր ձիու մեջքին զարկեց.
Սա էլ երետ փորը գետին.
— Ջա՛ն կարմիր ձի, մինչ ե՞րբ դու ինձ
Կըհասցընես Դավթի կըռվին։
«Մի ժամի մեջ, կարմիրն ասավ,
Կըհասցընեմ Դավթի կըռվին»։
— Լեղի դառնա, սև մահ ու ցավ,
Ինչ տըվել եմ քեզ՝ էն գարին։
Հերթը եկավ սևին հասավ.
Գետին չերետ փորը սև ձին։
— Է՜յ, ջան Սևուկ, մինչ ե՞րբ, ասավ,
Կըհասցընես Դավթի կըռվին։
«Եթե ամուր մեջքիս մընաս,
Ոտըդ դընես ասպանդակին,
Մինչև մեկել ոտըդ շուռ տաս,
Կըհասցընեմ», ասավ սև ձին։
24
Սև ձին քաշեց Ձենով Օհան,
Ձախը դըրավ ասպանդակին,
Աջն էլ մինչև շուռ տար վըրան.
Կանգնեց Սասմա սարի գըլխին։
Տեսավ՝ Դավթի նըժույգն անտեր
Սարերն ընկած խըրխընջալով,
Ներքև Մըսրա զորքը չոքած,
Ինչպես անծեր ծըփուն մի ծով։
Օխտը գոմշի կաշի հագավ,
Որ չըպատռի իրեն զոռից,
Կանգնեց Օհան ամպի նըման
Գոռաց Սասմա սարի ծերից։
— Հե՜յ-հե՜յ, Դավի՜թ, որտե՜ղ ես դու.
Հիշի՜ր խաչը քո աջ թևի,
Սուրբ Տիրամոր անունը տո՜ւր,
Ու դուրս արի լույսն արևի…
Ձենը գընաց դըմբդըմբալով՝
Դավթի ականջն ընկավ հորում.
— Հա՛յ-հա՜յ, ասավ, հորեղբայրս է,
Սասմա սարից ինձ է գոռում։
Ո՜վ Մարութա Աստվածածին,
Ո՜վ անմահ խաչ պատարագի,
Ձե՜զ եմ կանչել, — հասե՜ք Դավթին…
Կանչեց, տեղից ելավ ոտքի,
Էնպես զարկեց ջաղացքարին՝
Քարը եղավ հազար կըտոր,
Կըտորները երկինք թըռան,
Ու գնում են մինչև էսօր։
Ելավ նորից, կանգնեց ահեղ,
Սարսափ կալավ դև Մելիքին։
— Դավիթ ախպեր, ե՛կ դեռ էստեղ,
Սեղան նըստե՜նք, խոսենք կարգի՜ն…
— Էլ չեմ նըստիլ ես քու հացին,
Դու տըմարդի, վախկոտ ու նենգ.
Շո՛ւտ, զենքըդ առ, հեծիր քու ձին,
Դո՛ւրս եկ մեյդան, կըռիվ անենք։
— Կըռիվ անենք, ասավ Մելիք,
Իմն է միայն զարկն առաջին։
— Քոնն է, զարկի՛ր, կանչեց Դավիթ,
Գընաց, կեցավ դաշտի միջին։
Ելավ, կանգնեց Մըսրա-Մելիք,
Իր գուրզն առավ, հեծավ իր ձին,
Քըշեց, գընաց մինչ Դիարբեքիր
Ու էնտեղից եկավ կըրկին։
Երեք հազար լիդր էր քաշում
Հըսկայական իր մըկունդը.
Եկավ, զարկեց. կորավ փոշում
Ու երերաց երկրի գունդը։
— Երկիր քանդվեց կամ ժաժք եղավ,
Ասին մարդիկ շատ աշխարքում։
— Չէ՛, ասացին, արնի ծարավ
Հըսկաներն են իրար զարկում։
— Մեռավ Դավիթ էս մի զարկից,
Ասավ Մելիք իրեն զորքին։
— Կենդանի ե՜մ, ամպի տակից
Գոռաց Դավիթ Մըսրա-Մելքին։
— Հա՛յ-հա՜յ, մոտիկ տեղից եկա,
Տե՛ս, ո՜րտեղից հիմի կըգամ։
Ու վերկացավ, կանգնեց հըսկան,
Իր ձին հեծավ երկրորդ անգամ։
Երկրորդ անգամ քըշեց Հալաբ
Ու բաց թողեց ձին Հալաբից.
Բուք վեր կացավ, տեղ ու տարափ,
Արար աշխարհ դողաց թափից։
Եկավ, զարկեց. զարկի ձենից
Մոտիկ մարդիկ ողջ խըլացան։
— Գընա՜ց Դավիթ Սասմա տանից,
Գուժեց գոռոզ Մըսրա արքան։
— Կենդանի՜ եմ, կանչեց Դավիթ,
Մին էլ արի՜ — հերթն ինձ հասավ։
— Հա՛յ-հա՜յ, մոտիկ տեղից եկա,
Կանչեց Մելիք ու վեր կացավ։
Երրորդ անգամ հեծավ իր ձին,
Գընաց մինչև հողը Մըսրա,
Ու էնտեղից գուրզը ձեռին
Քըշեց, եկավ Դավթի վըրա։
Եկավ, զարկեց բոլոր ուժով,
Ծանըր զարկով հըսկայական.
Փոշին ելավ Սասմա դաշտից,
Բըռնեց երեսն արեգական։
Երեք գիշեր ու երեք օր
Փոշին կանգնեց ամպի նըման,
Երեք գիշեր ու երեք օր
Բոթը տըվին Դավթի մահվան։
Երբ որ անցավ երեք օրը,
Էն ամպի պես կանգնած փոշում
Կանգնեց Դավիթ, ինչպես սարը,
Գըրգուռ սարը մեգ-մըշուշում։
— Մելի՛ք, ասավ, ո՞ւմն է հերթը։
Սարսափ կալավ գոռ Մելիքին,
Մահվան դողը ընկավ սիրտը
Ու տապ արավ գոռոզ հոգին։
Գընաց, խորունկ մի հոր փորեց,
Իջավ, մըտավ վիհն էն խավար,
Վըրեն քաշեց քառսուն կաշի
Ու քառասուն ջաղացի քար։
Մըռընչալով ելավ տեղից
Էն առյուծի առյուծ որդին,
Իր ձին հեծավ ու փոթորկեց,
Խաղաց, շողաց Թուր-Կեծակին։
Առաջ վազեց մազերն արձակ
Մելքի պառավ մայրը ջադու.
— Դավի՜թ, մազըս ա՛ռ ոտիդ տակ,
Էդ մի զարկը ի՛նձ բաշխիր դու։
Երկրորդ անգամ թուրը քաշեց.
Էս անգամ էլ եկավ քուրը.
Դավի՜թ, եթե կուզես, կանչեց,
Իմ սըրտին զա՛րկ երկրորդ թուրը…
Վերջին զարկի ժամը հասավ,
Ելավ Դավիթ երրորդ անգամ.
— Էս մի զարկն ու աստված, ասավ,
Էլ մարդ չըգա, պետք է որ տամ։
Ասավ, ելավ ու փոթորկեց,
Թըռավ, ցոլաց Դավթի հուր ձին,
Ձին փոթորկեց, փայլատակեց
Ու ցած իջավ Թուր-Կեծակին։
Անցավ քառսուն գոմշի կաշին,
Անցավ քառսուն քարերը ցած,
Միջից կըտրեց ժանտ հըրեշին,
Օխտը գազ էլ դենը գընաց։
— Կենդանի՜ եմ, մին էլ արի՜,
Գոռաց Մելիք հորի տակից։
Դավիթ լսեց, շատ զարմացավ
Իրեն զարկեց, Թուր-Կեծակից…
— Մելի՛ք, ասավ, թա՛փ տուր մի քեզ։
Ու թափ տըվավ Մելիքն իրեն,
Միջից եղավ ճիշտ երկու կես,
Մեկն ընկավ դեսն ու մյուսը դեն։
Էս որ տեսավ Մըսրա բանակ,
Ջուր կըտըրվեց ահ ու վախից։
Դավիթ կանչեց. — Մի՛ վախենաք,
Ակա՛նջ արեք հալա դեռ ինձ։
Դուք ըռանչպար մարդիկ, ասավ,
Զուրկ ու խավար, քաղցած ու մերկ,
Հազար ու մի կըրակ ու ցավ,
Հազար ու մի հոգսեր ունեք։
Ի՜նչ եք առել նետ ու աղեղ,
Եկել թափել օտար դաշտեր.
Չէ՞ որ մենք էլ ունենք տուն-տեղ,
Մենք էլ ունենք մանուկ ու ծեր…
Ձանձրացե՞լ եք խաղաղ ու հաշտ
Հողագործի օր ու կյանքից,
Թե՞ զըզվել եք ձեր հանդ ու դաշտ,
Ձեր հունձ ու փունջ, վար ու ցանքից…
Դարձե՛ք եկած ճանապարհով
Ձեր հայրենի հողը Մըսրա.
Բայց թե մին էլ զենք ու զոռով
Վեր եք կացել դուք մեզ վըրա,
Հորում լինեն քառսուն գազ խոր
Թե ջաղացի քարի տակին, —
Կելնեն ձեր դեմ, ինչպես էսօր,
Սասմա Դավիթ, Թուր-Կեծակին։
Էն ժամանակ աստված գիտի,
Ով մեզանից կըլնի փոշման.
Մե՞նք, որ կելնենք ահեղ մարտի,
Թե՞ դուք, որ մեզ արիք դուշման։
Հարստություն թե ընկերություն
Հեքիաթի հեղինակ` Վալերի Բալասյան
Գոռոզ չղջիկը (ամերիկյան ժողովրդական հեքիաթ)
Աշնանային մի ցուրտ օր չղջիկը թռչում էր անտառով և դառնաղի արտասվում: Նրա լացի ձայնը լսեց թռչունների արքան` արծիվը:
— Ինչո՞ւ ես լալիս, փոքրիկ չղջիկ,- հարցրեց նա:
— Լաց եմ լինում, որովհետև շատ եմ մրսում:
— Չէ՞ որ մյուս թռչունների համար էլ է ցուրտ, բայց նրանք չեն բողոքում:
— Չէ՛, նրանք չեն մրսում այնքան, որքան ես, որովհետև փետուրներ ունեն, իսկ ես չունեմ:
Արծիվը մի պահ մտածեց, հետո հրամայեց կաչաղակներին, որ բոլոր թռչուններից մեկական փետուր հավաքեն չղջիկի համար: Երբ չղջիկն ամրացրեց բերված փետուրները, դարձավ հրաշագեղ: Նրա թևերը, գլուխն ու փորիկը շողշողում էին ծիածանի բոլոր գույներով: Չղջիկը շատ գոռոզացավ: Նա այլևս չէր խոսում մյուս թռչունների հետ: Օրերով նստում էր ճյուղին, հիանում ջրափոսի սառած հայելու մեջ երևացող իր չքնաղ արտացոլանքով:
Վիրավորված թռչունները բողոքեցին արծվին:
— Չղջիկն իրեն հիմա անտառի առաջին գեղեցկուհին է համարում,- ասացին նրանք:- Նա երևակայում է իրեն, ոչ մեկի հետ չի խոսում և նույնիսկ սիրամարգին է անճոռնի անվանում:
Արծիվը չղջիկին կանչեց իր մոտ և հարցրեց.
— Ճի՞շտ են ասում անտառի թռչունները:
— Իհարկե,- պատասխանեց չղջիկը:- Նրանց ընկերակցությունն ինձ հարմար չէ: Ես նրանցից շատ ավելի գեղեցիկ եմ: Համոզվեք ինքներդ, Ձե՛րդ մեծություն: — Եվ չղջիկը պարզեց թևերը: Արծիվը տեսավ, որ դրանք, իսկապես, չքնաղ են:
— Գերազանց է,- ասաց արծիվը:- Եթե դու կարծում ես, որ այդքան սիրուն ես, ապա թող յուրաքանչյուր թռչուն հետ վերցնի իր փետուրը: Տեսնենք` առանց դրանց ի՞նչ տեսք կունենաս:
Բոլոր թռչունները նետվեցին չղջիկի վրա և խլեցին իրենց փետուրները: Իր արտացոլանքը տեսնելով` չղջիկը սարսափեց. ջրափոսից իրեն էր նայում մերկ, կնճռապատ, այլանդակ մի արարած: Չղջիկն այնպես ամաչեց, որ դրանից հետո սկսեց միայն գիշերը դուրս գալ, որպեսզի իրեն ոչ ոք չտեսնի:
Ծերունիների իմաստությունը (բուլղարական հեքիաթ)
Մի դաժան արքա բոլոր ծեր մարդկանց կոտորելու հրաման արձակեց:
— Ինչ օգուտ նրանցից,- ասաց թագավորը,- ո՛չ հերկել են կարողանում, ո՛չ հնձել, ո՛չ ցախ կոտրատել: Զուր տեղը հաց են ուտում, տանը` ոտքի տակ ընկնում: Առանց նրանց ապրելն ավելի լավ կլինի:
Թագավորի դահիճները գործի անցան, բոլոր ծերերին կոտորեցին: Միայն մեկ ծերունի մնաց` մի իշխանի հայր: Իշխանը խղճաց իր ծեր հորը, թաքցրեց և սկսեց նրան թաքուն կերակրել:
Դաժան արքան մի կամակոր սև նժույգ ուներ, որն աքացի էր տալիս, խրտնում էր, կանգնում հետևի ոտքերին, հեծյալներին տապալում գետնին: Ոչ ոք չէր կարողանում հեծնել նժույգը: Արքան իմացավ, որ մայրաքաղաքում մի իմաստուն հեքիմ կին է ապրում: Հրամայեց պալատ բերել նրան և սկսեց հարցուփորձ անել, թե ինչպես կարելի է աշխույժ նժույգը սանձել:
— Արքա,- ասաց կինը,- հրամայիր քո իշխաններին, որ ավազից պարան հյուսեն և այդ պարանով ձիու երեք ոտքերը կապ գցեն: Նժույգդ գառան պես հնազանդ կդառնա:
Թագավորը ծոծրակը քորեց և կանչեց իշխաններին:
— Հե՜յ, իշխաններ,- գոռաց նա,- լսե՛ք իմ հրամանը. վաղն առավոտյան ավազից հյուսված պարանն իմ ձեռքում պիտի լինի: Եթե առանց պարանի գաք պալատ, ձեր գլուխներն իրենց տեղերում չեն մնա:
Իշխանները գլխահակ ցրվեցին. մի՞թե հնարավոր էր արքայի այդ հրամանը կատարել: Այն իշխանը, որը խնայել էր հոր կյանքը, նույնպես նրանց մեջ էր: Տուն եկավ մտախոհ, տխուր: Եվ հայրը հարցրեց նրան.
— Ինչո՞ւ ես այդպես մռայլ, որդի՛ս:
Նա հայտնեց արքայի հրամանը:
— Վիշտդ հեշտ է դարմանել, տղաս,- ասաց ծերունին:- Վաղն առավոտյան, երբ գնաս պալատ ու թագավորը հարցնի` ո՞ւր է պարանը, դու նրան այսպես պատասխանիր.
— Թագավորն ապրած կենա, մենք պատրաստ ենք ավազից պարան հյուսել, բայց չգիտենք, թե ինչպիսին պետք է լինի այն` հաստ, թե բարակ, դեղին, թե կարմիր: Նմուշը մեզ ցույց տուր:
Հաջորդ օրը, այդքան խելացի պատասխան լսելով, թագավորը գլուխը կախեց և ասաց.
— Դուք իրավացի եք, ես պետք է ձեզ նմուշը տամ, բայց դա չեմ կարողանա անել:
Եվ արքան խնայեց իր իշխանների կյանքը:
Նույն տարվա ամռանը երկրում երաշտ սկսվեց: Կիզիչ արևի ճառագայթներն այրեցին ամեն ինչ` և՛ խոտը, և՛ ցորենը, և՛ պտուղները: Ցամաքեցին գետերն ու ջրերը, ամբարները դատարկվեցին. ոչ մի հատիկ ցորեն չմնաց: Մարդիկ սարսափահար էին, բոլորին սպառնում էր սովամահությունը: Թագավորը մտքերի մեջ ընկավ, կանչեց իշխաններին և հրամայեց.
— Ինչ ուզում եք` արեք, բայց եթե վաղն առավոտյան ինձ չասեք, թե ցանքի համար որտեղից ցորեն ճարենք, ձեր գլուխները ձեր ուսերին չեն մնա:
Վշտացած իշխանները գնացին: Շատ դժվար էր ցորեն ճարելը: Ծեր հայրը տեսավ, որ որդին արքայի մոտից դարձյալ սև ամպից էլ սևակնած է վերադարձել, հարցրեց.
— Ի՞նչ է պատահել, որդի՛ս:
— Այս անգամ, հայրի՛կ, դու էլ չես կարողանա ինձ օգնել,- պատասխանեց իշխանը:
— Ինչո՞ւ:
— Որովհետև թագավորին ցանքի համար ցորեն է պետք, իսկ ողջ երկրում ցորեն չկա:
— Մի՛ անհանգստացիր, տղա՛ս,- ասաց ծերուկը:- Երբ վաղը թագավորի մոտ գնաս, նրան խորհուրդ տուր, որ նա հրամայի գյուղացիներին՝ քանդել բոլոր մրջնանոցները: Դրանց մեջ ցորեն շատ կա. մրջյունները հատիկ-հատիկ հավաքել են:
Այդպես էլ արվեց: Գյուղացիները դաշտ դուրս եկան, փորփրեցին բոլոր մրջնաբները և յուրաքանչյուրում մի քսակ ընտիր ցորեն գտան: Խնդրի այս զարմանալի լուծումը շատ զարմացրեց թագավորին:
— Ասա՛ ինձ, այդ իմաստուն խորհուրդն ո՞վ տվեց քեզ,- հարցրեց նա այն իշխանին, որը խնայել էր հոր կյանքը:
— Չեմ համարձակվում ասել, արքա, որովհետև ինձ կկործանես,- գլուխը խոնարհեց իշխանը:
— Խոստանում եմ, որ գլխիցդ մազ անգամ չի պակասի:
Իշխանը խոստովանեց, որ ժամանակին թաքցրել է հորը, և որ հենց հայրն է իրեն սովորեցրել թե՛ ավազե պարանի համար տրված պատասխանը, թե՛ ցորենի ճարն անելը:
Այդ ժամանակ նոր օրենք դուրս եկավ. արգելվում էր ծերերին վիրավորելը, իսկ հանդիպելիս յուրաքանչյուրը պարտավոր էր նրանց զիջել ճանապարհը:
Գրավ դրած մորուքը (պարսկական հեքիաթ)
Մի մարդ մի օր գնում է մի հարուստ վաճառականի մոտ պարտք ուզելու։
— Պարտքով մի քիչ փող տուր, որ գործերս, առևտուրս կարգի գցեմ,- խնդրում է։- Համոզվա՛ծ եղիր, որ պարտքդ վերադարձնելու եմ։
— Ես քեզ պարտքով փող կտամ՝ պայմանով, որ վստահելի մեկը քեզ երաշխավորի,- ասում է վաճառականը։
Մարդը թե.
— Մինչև օրս ոչ մի վստահելի վաճառականի հետ գործ չեմ բռնել և ոչ էլ մեկին գիտեմ, որ ինձ երաշխավորի։
— Լա՛վ,- ասում է վաճառականը,- կօգնեմ, բայց դու քո մորուքից մի մազ պիտի ինձ մոտ գրավ դնես։
Մարդը թե.
— Այդ դեպքում, խնդրում եմ, ինձ մի քիչ վարդաջուր ու մի հատ էլ հայելի տուր։
Երբ վաճառականը նրան հայելի է տալիս ու վարդաջուր մատուցում, մարդը նախ մորուքին խնամքով վարդաջուր է ցողում, ապա գրպանից մի սանր է հանում ու զգույշ սանրում։ Հետո սանրի ատամների արանքից մի մազ է հանում, դնում մետաքսե թաշկինակի մեջ, չորս ծայրից ծալում է ու երկու ձեռքով խոնարհաբար մեկնում վաճառականին։
Որոշ ժամանակ անց՝ այդ առևտրականը մեծ հարստություն է կուտակում, գալիս է պարտատիրոջ մոտ, շնորհակալություն է հայտնում ու վերցրած պարտքը հետ տալիս։
Մի օր էլ նա մի մեծ ու բազմամարդ խնջույք է կազմակերպում։ Հրավիրվածներից մեկը դառնում է նրան ու հարց֊նում.
— Որքան հիշում եմ, դու էլ ինձ նման աղքատ էիր, այս ամբողջ հարստությունը ինչպե՞ս, ի՞նչ ճանապարհով նորից ձեռք բերեցիր։
Եվ նա անկեղծորեն պատմում է գրավ դրած իր մորուքի պատմությունը։
Հաջորդ օրն այդ աղքատ առևտրականը գնում է մեզ ծանոթ հարուստ վաճառականի մոտ ու պարտքով փող խնդրում։ Վաճառականի այն հարցին, թե ծանոթներից ո՞վ իրեն կերաշխավորի, պատասխանում է.
— Աստվա՛ծ վկա, ես ոչ մի ծանոթ չունեմ։ Օրվա հացի կարոտ, խեղճ ու աղքատ մարդ եմ։
Վաճառականը թե.
— Այդ դեպքում քո մորուքից մի մազ փողի դիմաց ինձ մոտ գրավ դիր։
— Ընդամենը մի մա՞զ,- զարմանում է այդ մարդն ու ձեռքը գցում, մորուքից մի փունջ մազ է պոկում, մեկնում վաճառականին։
Այդ տեսնելով՝ վաճառականը մտածում է. «Եթե այս մարդն ինքն իրեն չի հարգում, պարզ է, թե ինչպես կվարվի դիմացինի հետ»։ Եվ, որպեսզի նա չգնա և ուրիշ վաճառականների խաբի, բարձրաձայն ասում է.
— Մի բան լսել ես մորուքի մասին, բայց ունեցածդ այն մորուքը չէ, ուստի պարտքի մասին խոսելն էլ ավելորդ է։
Ինչն է ավելի կարևոր (իտալական հեքիաթ)
Մի անգամ երկու ընկեր վիճեցին, թե մարդու կյանքում ինչն է ավելի կարևոր:
— Մտածելու բան չկա,- բացականչեց նրանցից մեկը,- փողն է երջանկություն բերում: Դու գիտես, չէ՞, թե ես ինչպես բանաստեղծ դարձա: Ոչ ոք չէր ուզում իմ բանաստեղծությունները տպագրել: Բայց մահից առաջ հորաքույրս ինձ թողեց իր ունեցվածքը, և ես ինքս տպագրեցի իմ ոտանավորները: Այդ օրվանից հրատարակիչներից պրծում չունեմ: Հորաքրոջս փողերը եթե չլինեին, հիմա ոչ ոք չէր էլ իմանա, որ ես բանաստեղծ եմ:
— Հիմարություն,- ընդհատեց երկրորդ ընկերը:- Ամեն ինչ ճակատագիրն է որոշում: Ես հիմա համարվում եմ Իտալիայի լավագույն երգիչը: Բայց շատ ժամանակ չի անցել այն օրերից, երբ ինձ ոչ ոք լսել չէր ուզում: Ես էլ երգում էի ծովի ափին` ձկների համար: Ճակատագրին հաճելի էր, որ հենց այն ժամանակ, երբ ես հերթական անգամ երգում էի ծովափին, անձամբ կոմս Լուիջին զբոսանքի դուրս գա: Կոմսը լսեց ինձ, և հրավիրեց երգելու իր հարսնացուի պատվին կազմակերպված պարահանդեսին: Այդպես էլ ամեն ինչ սկսվեց: Ի՞նչ գործ ունի այստեղ փողը: Ճակատագի՛րն է կարևոր, ընկերս, ճակատագի՛րը:
Երկար վիճեցին բանաստեղծն ու երգիչը, բայց չհամոզեցին իրար և գնացին զբոսնելու: Դուրս գալով տնից՝ քայլեցին ուր աչքները կկտրեր: Հասան մինչև քաղաքի սահմանը և այնտեղ տեսան մի կիսավեր խրճիթ: Ցնցոտիներով մի պատանի, խրճիթի շեմին նստած, կիթառ էր նվագում:
— Լսի՛ր, բարեկամ, դու, ինչպես տեսնում եմ, շատ ուրախ ես ապրում,- ձայն տվեց նրան բանաստեղծը:
— Ինչ ուրախություն, երբ մարդը երկրորդ օրն է` ոչինչ չի կերել,- պատասխանեց պատանին:
— Այդ դեպքում ինչո՞ւ ես կիթառ նվագում,- հարցրեց երգիչը:
— Ի՛նչ անեմ, կիթառը միակ բանն է, որ ինձ ժառանգություն է թողել հայրս,- ասաց տղան:
Ընկերները նայեցին իրար. երկուսն էլ միաժամանակ նույն բանը մտածեցին. «Սա այն է, ինչ մեզ պետք է: Հիմա մենք կիմանանք, թե ի՛նչն է ավելի կարևոր»: Նրանցից յուրաքանչյուրը գրպանից հիսուն սկուդո հանեց և տվեց կիթառահարին:
— Հարյուր սկուդո՜,- բացականչեց պատանին:- Շնորհակա՜լ եմ, բարի՛ պարոններ:
— Շնորհակալությունը քեզ պահիր, ուղիղ մեկ տարուց հետո մենք կգանք իմանալու` օգնեցի՞ն արդյոք քեզ այս փողերը, թե՞ ոչ,- ասացին ընկերները և հետ դարձան:
Նրանք ճանապարհի շրջադարձն անցան թե չէ, տղան, որի անունն Ալչիդե էր, մտածեց.
— Ես, նախևառաջ, շա՜տ նրբերշիկ կգնեմ, իսկ հետո կմտածեմ, թե ի՛նչ եմ անելու այս անսպասելի հարստությունը:
Տղան փողը դրեց գլխարկի աստառի տակ և ճանապարհ ընկավ դեպի կրպակ: Բայց… Ալչիդեն տասը քայլ էլ չէր հասցրել անել, երբ հանկարծ, չլսված բան, ձիթենու ծառից մի գզգզված ագռավ թռավ- եկավ, ճանկեց Ալչիդեի գլխարկն ու թռավ:
— Գո՜ղ, տուր փողերս,- բղավեց խեղճ տղան: Բայց ագռավն ավելի արագ թափահարեց թևերն ու անհետացավ:
Անցավ մեկ տարի: Բանաստեղծն ու երգիչը կրկին եկան Ալչիդեի հյուղակի մոտ: Դուռը թակելու կարիք չեղավ, որովհետև տղան, ինչպես և առաջին հանդիպման ժամանակ, նստած էր շեմին և կիթառ էր նվագում:
— Ինչպե՜ս,- զարմացած բացականչեցին ընկերները,- դու դեռ կիթա՞ռդ ես ծնգծնգացնում:
— Էլ ի՞նչ է մնում անելու, եթե գզգզված ագռավը հին բերետիս հետ տարավ իմ երջանկությունը,- ընկճված պատասխանեց Ալչիդեն և պատմեց ձեզ արդեն հայտնի համառոտ, բայց տխուր պատմությունը:
— Դե՛,- բանաստեղծին դարձավ երգիչը,- մի՞թե ես չէի ասում, որ երջանկություն և դժբախտություն ճակատագիրն է ուղարկում: Լավ, թող որ ագռավը որոշել էր իր բնում ոչ թե չոր ճյուղերի, այլ փափուկ լաթի վրա քնել: Բայց բացատրիր, խնդրում եմ, ինչո՞ւ ագռավին Ալչիդեի գլխարկը պետք եկավ հենց այն պահին, երբ տղան դրա մեջ թաքցրեց փողը:
— Հիմարությու՜ն,- ընդհատեց երգչին բանաստեղծը:- Եթե ագռավը չտաներ դրամները, Ալչիդեն հիմա հրաշալի կապրեր: Ճիշտ չէ՞, ընկե՛րս, փողն ամեն ինչ է:
Այս ասելով՝ բանաստեղծը դարձյալ ձեռքը տարավ գրպանը, հանեց ևս հարյուր սկուդո և մեկնեց Ալչիդեին: Տղան ջերմորեն շնորհակալություն հայտնեց, բայց ընկերները ձեռքները թափ տվեցին, խոստացան վերադառնալ ուղիղ մեկ տարի հետո և գնացին:
Այս անգամ Ալչիդեն որոշեց ավելի շրջահայաց լինել: Ուղևորվելով դեպի կրպակ` նրբերշիկ գնելու (հիշո՞ւմ եք, չէ՞, որ մեկ տարի առաջ նրան այդպես էլ չհաջողվեց նրբերշիկ ուտել), Ալչիդեն մի արծաթե դրամ դրեց բերանի մեջ, իսկ մնացած իննսունինն ապահով թաքցրեց… որտե՞ղ, ի՞նչ եք կարծում. անկյունում ընկած հին կոշիկի մեջ:
— Հիմա արդեն ոչ մի ագռավ դրան չի հասնի,- իր խորամանկությունից շատ գոհ` ասաց Ալչիդեն:- Գողն էլ այսպիսի հնոտու չի մոտենա:
Բայց երբ Ալչիդեն գնաց կրպակ, ահա թե ինչ տեղի ունեցավ: Խրճիթ մտավ հարևանի կատուն, որին տերերը կերակրում էին միայն այն ժամանակ, երբ իրենք կշտանում էին, իսկ այդպես երբեք չէր լինում: Կատուն շրջեց ամբողջ սենյակում, բայց ուտելու ոչ մի բան չգտավ: Հանկարծ բնից դուրս վազեց մուկը: Կատուն ընկավ մկան հետևից: Մուկը դեսուդեն վազեց և խցկվեց հենց կոշիկի մեջ՝ նույն կոշիկի, որի մեջ Ալչիդեն թաքցրել էր փողը: Կատուն մի ակնթարթում շրջեց կոշիկը, դրամները գլորվեցին, իսկ մուկը սողոսկեց իր բույնը: Այդ ժամանակ կատուն սկսեց խաղալ փողերով. գլորում էր դրանք ու խցկում մկան բույնը: Այդպես` մինչև վերջին սկուդոն: Երբ Ալչիդեն կրպակից վերադարձավ, պարզեց, որ ինքն այժմ ավելի հարուստ չէ, քան երեկ էր: Փողն անհետացել էր: Լավ էր գոնե, որ այս անգամ նրան հաջողվեց նրբերշիկ ուտել: Ահա թե ինչու զարմանալի չէ, որ երբ մեկ տարի հետո երգիչն ու բանաստեղծը կրկին եկան այստեղ, Ալչիդեն հին հյուղակի շեմին նստած դարձյալ կիթառ էր նվագում:
— Դե՜,- բացականչեց բանաստեղծը,- սա արդեն բանի նման չէ: Գուցե այս անգամ էլ մեզ հավատացնես, որ հարյուր սկուդոն մկնե՞րն են տարել:
— Ավա՜ղ, բարի պարոններ,- հոգոց հանեց Ալչիդեն,- ես ձեզ ոչինչ էլ չեմ կարողանա ասել, որովհետև ինքս էլ չգիտեմ, թե ուր կորան փողերը:
— Հիմա գոնե համոզվեցի՞ր, որ ամեն ինչ ճակատագիրն է որոշում,- ասաց երգիչը բանաստեղծին:
— Հակառակը,- պատասխանեց բանաստեղծը,- ավելի համոզվեցի, որ միայն փողն է մարդուն երջանիկ դարձնում: Բայց իմ ճշմարտացիությունն ապացուցել այլևս չեմ փորձի: Դա շատ թանկ է նստում ինձ վրա: Հիմա էլ դու ապացուցիր:
— Փորձեմ,- ասաց երգիչը: Նա փորփրեց գրպանն ու այնտեղից մի փոքրիկ կապարե գնդիկ հանեց: Ճիշտն ասած, երգիչն ինքն էլ չէր հիշում, թե դա ինչ գնդիկ է և ինչպես է հայտնվել իր գրպանում:
— Վերցրո՛ւ, խեղճ տղա,- ասաց երգիչը` գնդիկն Ալչիդեին մեկնելով:- Գուցե սա քեզ փողից առավել պետք գա:
Ընկերները հրաժեշտ տվեցին ու գնացին:
Գնդիկը երկար ժամանակ մնացել էր երգչի գրպանում, բայց շատ ավելի երկար մնաց Ալչիդեի գրպանում: Գնդիկի մասին պատանին հիշեց միայն այն ժամանակ, երբ փորը քաղցից լրիվ սմքեց: Նույնիսկ կիթառը չէր օգնում նրան: Ալչիդեն գնդիկը հանեց գրպանից, ափի մեջ այսուայն կողմ գլորեց ու մտածեց. «Վաճառեմ՝ սրա համար ինձ մի սալդո անգամ չեն տա: Բայց եթե ինչ-որ մեկը սա սարքել է, նշանակում է՝ ինչ-որ բանի պետք է, չէ՞»: Հանկարծ Ալչիդեն ձեռքը խփեց ճակատին.
— Ո՜նց մինչև հիմա գլխի չէի ընկել: Ախր սա գերազանց սուզագնդիկ կլինի:
Տղան կտրեց ուռենու մի ճկուն, երկար ճյուղ, քորոցը կեռիկի պես ծալեց, գնդիկն էլ ամուր թելով կապեց դրան: Մի խոսքով՝ մեկ ժամից Ալչիդեն նստած էր ծովափին և փորձում էր ձուկ որսալ: Բայց ձուկը, ասես նրան հակառակ, չէր մոտենում խայծին: Ալչիդեն ափին նստեց առավոտից մինչև կեսօր, ապա` կեսօրից մինչև երեկո: Մեկ ուրիշը նրա փոխարեն ձեռք կքաշեր այդ գործից, բայց Ալչիդեն շուտ հուսահատվողներից չէր: Եթե որևէ բան էր նախաձեռնում, գործը միշտ ավարտին էր հասցնում: Նա որոշեց ձկներից ավելի համառ լինել: Եվ կարողացավ: Մայրամուտի ժամանակ ձկներն սկսեցին մոտենալ խայծին: Պատանի ձկնորսը հազիվ էր հասցնում ձուկը հանել ջրից և կարթը նորից ջուրը նետել: Այդ գիշեր Ալչիդեն շատ համով ձկնապուր կերավ: Վատ չէր լինի` մենք էլ փորձեինք: Ձուկն այնքան շատ էր, որ վաղ առավոտյան տղան որսի կեսը վաճառեց շուկայում: Հետո կրկին վազեց ծովափ: Եվ սկսվե՜ց: Կարթը բռնած` օրերով նստում էր ծովափին: Կես տարի անց նա մի ուռկան ձեռք բերեց, ևս կես տարի անց` մի նավակ, ու դարձավ իսկական ձկնորս:
Իսկ բանաստեղծն ու երգի՞չը… Ի՞նչ պատահեց նրանց: Օ՜, նրանք այնքան զբաղված էին, որ մոռացել էին աղքատ կիթառահարին: Երկուսն էլ մեկնեցին հեռավոր ճանապարհորդության՝ մեկը` արևելք, մյուսը` արևմուտք: Հինգ տարի անց նրանք հանդիպեցին հայրենի քաղաքում: Հիշեցին Ալչիդեին և որոշեցին այցելել նրան: Եկան նույն տեղը, որտեղ հանդիպել էին տղային: Նայում են` խրճիթը չկա: Փոխարենը մի սիրուն տնակ է, տնակի մոտ երկու երեխա խաղում են, իսկ երեխաներին ժպտում է շեմի մոտ կանգնած ջահել տանտիրուհին: Ընկերները մոտեցան և հարցրին կնոջը.
— Դուք չգիտե՞ք, թե հիմա որտեղ է ապրում կիթառահար Ալչիդեն:
— Ինչպե՞ս չէ, գիտեմ,- պատասխանեց կինը, շրջվեց և կանչեց,- ամուսնյա՜կ, երկու հարգարժան պարոն քեզ են հարցնում:
Կնոջ կանչի վրա տնից դուրս եկավ նրա ամուսինը՝ Ալչիդեն: Սկսվեց հարցուփորձը: Նստեցին շեմի մոտ, և Ալչիդեն հերթով պատմեց այն, ինչը դուք արդեն գիտեք: Դա չենք պատմի, իսկ ինչը դեռ չգիտեք՝ հիմա լսեք:
— …Այդպես, թանկագին պարոններ, ես նավակ և մի լավ ուռկան գնեցի ու դարձա ձկնորս: Հետո ինձ դուր եկավ Ջովաննան, ես էլ` նրան: Այդ գործում, խոստովանում եմ, ինձ օգնեց կիթառս: Երեք ամիս չանցած` մենք ամուսնացանք: Դե՛, ջահել կնոջն ավերակ խրճիթը չէր սազում: Որոշեցինք այս նույն տեղում տնակ կառուցել: Քանդեցինք հին խրճիթը… Հիմա, թանկագին պարոններ, ուշադիր լսեք, սա ձեզ էլ է վերաբերում: Քանդեցինք… Հին ծխնելույզի մեջ ագռավի մի լքված բույն կար, բնում` իմ գլխարկը, գլխարկի մեջ` հարյուր սկուդո: Ես շատ ուրախ եմ, որ վերջապես հին պարտքս էլ կվերադարձնեմ:
Ալչիդեն վազեց ներս, բերեց քրքրված բերետը, որի մեջ զնգզնգում էին դրամները: Նա բանաստեղծին և երգչին հիսունական սկուդո տվեց և շարունակեց պատմությունը:
— Սա դեռ ամենը չէ: Հենց խրճիթի հատակը քանդեցինք, անկյունում` մկան բնում, իննսունինը սկուդո գտանք: Հարյուրերորդը ես այն ժամանակ ծախսել էի նրբերշիկի համար: Հիմա այդ պակասող դրամը դրել եմ տեղը:
Ջովաննան մտավ տուն և բերեց գեղեցիկ կապված քսակը, մեջը` հարյուր սկուդո: Ալչիդեն այն տվեց բանաստեղծին:
— Իսկ գնդիկը ես կպահեմ որպես հիշատակ,- ասաց Ալչիդեն:
Նա պատմությունն ավարտեց, իսկ ընկերների միջև բորբոքվեց նույն վեճը: «Ճակատագի՜ր»,- գոռում էր երգիչը: «Փո՜ղ»,- ավելի բարձր էր գոռում բանաստեղծը: Կրկին հիշեցին թե՛ հորաքրոջ ժառանգությունը, թե՛ կոմս Լուիջիի պատահական զբոսանքը նավակով: Ալչիդեն, որ ուշադիր լսում էր նրանց, վերջապես միջամտեց.
— Թույլ տվեք ես էլ իմ խոսքն ասեմ: Փողը` փող, ճակատագիրը` ճակատագիր, բայց, հավատացեք ինձ, որ գլխավորն աշխատանքն ու համառությունն են: Գուցե հորաքրոջ ժառանգությունն իսկապես օգնել է Ձեզ, պարոն բանաստեղծ, բայց չէ՞ որ Դուք երկար տարիներ աղքատ էիք ու չճանաչված և շարունակում էիք գրել: Ձեզ, պարո՛ն երգիչ, հռչակ բերեց կոմս Լուիջին, բայց չէ՞ որ մինչև այն երջանիկ պահը, երբ նա Ձեզ լսեց, Դուք չէիք դադարում երգելուց: Իսկ ինչ ինձ է վերաբերում, ապա այն ամենը, ինչ ես հիմա ունեմ, իմ սեփական աշխատանքի արդյունքն է:
Բանաստեղծն ու երգիչը մի պահ լռեցին, ապա միաձայն բացականչեցին.
— Տիրամայրը վկա, ճի՜շտ է ասում:
Հաստատակամ Յուն Սուն (չինական հեքիաթ)
Մի ժամանակ Ֆուչժոյուի մոտերքում ապրում էր մի փոքրիկ տղա՝ Յուն Սու անունով: Նրա հայրը շուտէմահանում, մնումենինքնումայրը: Նրանքաղքատ էին, տունը՝դատարկ. պատահում էր, որ նույնիսկ մի բուռ բրինձ էլ չէինունենում, որուտեն:
ԵրբՅուն Սունմեծացավուպետքէարդենուսումստանար, չուներ ո՛չ թուղթ, ո՛չ թանաք, ո՛չ էլ վրձին: Բայց նահաստատակամորեն որոշումէ. «Պետք է սովորեմ»: Նաերկարէ մտածում, թեինչպես խորամանկորենազատվիկարիքից:
Առավոտյան գնումէիր հարուստ հարևանի մոտ և ասում.
— Ես լսել եմ, որ դուք տան աշխատող եք փնտրում: Ընդունեքինձ: Ճիշտ է, տարիքս մեծ չէ, բայցես շատ բանչեմ էլուզում աշխատանքիդիմաց, թույլ տվեք ինձ միայն երբեմն նայել, թե ինչպես են սովորում ձեր որդիները, և ես գոհ կլինեմ:
Հարուստն ուրախանումէ. անվարձ աշխատողնիր ոտքով է եկել, և համաձայնումէ:
Յուն Սուն առավոտից երեկո աշխատում էր, չարչարվումհարուստի տանը: Բոլոր կեղտոտ ու ծանր աշխատանքները թողնում էին նրան: Բայց դրա փոխարեն նակարողանում էր երբեմն նայել այն գրքերին, որոնցով սովորում էին տանտիրոջ երեխաները: Մեկ- մեկ էլ հաջողվում էր լսել ամբողջ դասը: Երբգալիս էր նրանցուսուցիչը, Յուն Սուն թաքնվում էր անկյունում. նստում և ականջ էր դնում:
Մեկ տարի անց նա արդեն շատբառեր էրսովորել, գիտերդրանցիմաստը, բայց դժբախտությունն այն էր, որ գրել չգիտեր: Բայցինչի՞վրա գրեր: «Ի՞նչ անել»,- մտածումէՅուն Սուն: Երկարմտածելուցհետոհնարը գտնումէ:
Յուն Սուն ուիր մայրնապրում էինծովափին՝փոքրիկ տնակում: Ալիքներն ամբողջ օրը հարթում էին ծովափնյա մանր ավազը: Յուն Սուն վերցնումէրմի երկար ձող ու գնումծովափ: Նա արագ-արագ մի բառ էրգծագրումավազի վրա: Ալիքը գալիսև գրածըսրբումէր: Նորից էրգծագրում, ուրիշ մի ալիք դարձյալսրբումէրնրագրածը: Այդպես նա կարողանումէրանվերջ գրել՝առանց վրձնի ու թղթի, բայց հիմա էլգրքեր չուներ:
Մի անգամ Յուն Սուն մոտենումէիր հարուստ տիրոջնուասում.
— Ես ձեզ համարաշխատում եմ առանցվարձատրության: Հիմա ուզում եմ խնդրել, որինձվարձատրեք: Բայց եթե թույլ տաք ինձ կարդալ ձեր գրքերը, ես համաձայն եմ աշխատել էլի մեկ տարի:
Տանտերը չէր ուզումկորցնել այդպիսի ձեռնտու աշխատողին, ուստի և համաձայնումէ: Յուն Սուն արդենգրքեր էլ ուներ:
Մոտենում էր ձմեռը: Օրերն սկսելէինկարճանալ: Նաաշխատում էր մինչև մութն ընկնելը: Ցերեկվաժամերնարդեն չէին բավականացնում նրան: Յուն Սուն այնքան աղքատ էր, որ չէր կարող նույնիսկձեթ գնել ճրագի համար: Բայց համառ էր ու հաստատակամ: Լուսնկա գիշերները Յուն Սուն կարդում ու գրում էր լուսնի լույսով, իսկ երբ լուսիննամպերիհետևիցչէր երևում, նա հավաքում էր խոտերում փայլփլող լուսատտիկներնու կպցնում բամբակի ձողին: Դրանց արձակած թույլ լույսի տակ աշխատասերպատանինկարդումէր նաևմութգիշերով:
Տարիներ անցան: Յուն Սուն հասավ իր նպատակին. նա դարձավ մեծ գիտնական: Մինչև այսօր էլ մարդիկ հիշում են փոքրիկ, աղքատ Յուն Սուի հաստատակամությունը: